Panton Aceh Medya Hus 'Gara Gara Medsos'

Panton Aceh ‘Medya Hus’ Gara Gara Medsos

“Deungon bismillah di babah sabé Awai ngon akhé ingat Rabbana Ngon izin Tuhan karangan hasé Haba lam rawé pantô budaya”

Teungoh cot uroe rangoe dum padé Naleueng le maté takalon rupa Nabacut pantôn lôn susôn rawé Neuci baca lé nyang ka lôn rika

Aneuk leuek meusu ateueh u maté Aneuk cém padé ateueh bak jeumpa Nibak masa nyoe paloe bukon lé Kuta ngon diglé rap sama rata

Gunông nyang dikrok ka buhok reulé Kayèe dum maté jareueng soe pula Gara gara medsos teuboh bukon lé Ramè nyang meucré sayang lagoe na

Di Samani na ruti seulé Mangat bukon lé watèe tarasa Peue lom tan muphôm ladôm mat hp Internet tan pré sabé tiep masa

Blang di peureulak ka masak padé Geupuwoe hasé meugunca gunca Nyang meukat keudè lalè ngon hp Nyang duek bak kafé pih nyan di mata

Bola geusipak hai pak meugulé Tiyeuep hana pré mita numboi sa Pedagang guru Teungku ngon toké Medsos ka ok internet buka

Geumita eungkot di laôt keumawé Barô na geupré oh badè raya Aneuk sikula pih kana hp Mulai aneuk SD dan Mahasiswa

Aneuk buruwak di yub bak padé Di meusu sabé hana meuho ma Gasien ngon kaya mandum na hp Bak medsos sabé ureueng meujaga

Oh watèe kakhueng ie lueng hana lé Eungkôt dum maté sayang lagoe na Oh ta eu ureueng jareueng tan hp Kuta deungon glé mandum kagaya

Manok nyang tôh boh cit krèh kroh sabé Riyôh hana pré karu lagoina Di saboh segi raseuki na hp Mangat bukon lé tapeutrôh haba

Diyub bak jambèe asèe meupaké Riyôh bukon lé lam teungeut jaga Tapi nyang sayang kadang laén kré Ék sampé meucré wap posting gamba

Bak aleue seumèn bèk meu èn lélé Meunyo ngon beudé bèk wayang senda Bak bangi medsos teubohbukon lé Na nyang ka meucré hancô rumoh tangga

Di keudè matang geupangang saté Lagôt hana pré mangat lagoe Gara gara wa chat haba tan pré Kirém photo lé staus geutuka

Ateueh bak sawô aneuk tulô glé Di meusu tan pré seubab patah pha Dudoe meukarat sampôh chat tanlé Haba nyang ganjé ka lintô baca

Meunurôt berita na hasil seurfé Lé that nyang meucré wab dônya maya Ladôm meukawén laén geukawé Inöng phön geucré aneuk sengsara

Ladôm jak ublang abang ja uglé Ladôm gal;ak témpé peuneugot jawa Ladôm that paloe oh lheueh lakoe cré Nyang cinta hp jitém kahana

Tajak upeukan tan jajan rupé Sayang bukon ngon mubloe hana Ladôm keunöng drop gop jak peupaké Haba meusindé bak donya maya

Aneuk manyak moe paloe bukon lé Poma hana pré sabé meujaga Ladôm ka cupa dara ABG Rot facebook oke geupubloe cinta

Salah pajôh ubat meukarat akhé Kadang cit maté woe bak Rabbana Salah chat wa meutuka sipré Salah nomor hp meuteumèe tuha

Lam kulam paya na aneuk bacé Di ateueh bak plé tiwah that subra Ladom ngon online geupuloe témpé Awai jôk dp dudoe berjumpa

Oh jula malam bintang hana lé Ateuh pucak glé ujeut pih teuka Le seubab medsos reuloh abg Rôh lam buet jahé rot donya maya

Sayang boh pisang musang ja cungké Saboh mu hasé madum di seuba Sayang that insan nyang doyan hp Nyang candu kon lé salah peuguna

Gara gara naleueng meukaleueng padé Gara gara tbc tubôh bahaya Gara gara medsos teubôh dum saré Meulabô jahé meuteumèe désya

Pakon bak panjoe bak uboe maté Ukheue hana lé kabrôk silingka Pakon jeut medsos teuboh bukon lé Karna bohaté salah peuguna

Ci pula lada meujuta hasé Ci pula padé padum na gunca Ci bacut ingat bèk lezat sabé Ci bacut piké peue keuh na laba
Gunöng seulawah meugah bukon lé Sayang bukon leupie tah lé na Èt noe keuh pantôn lôn alô rawé Singöh laén kré ta sambông teuma.[]

 

Artikel Ini Sudah Tayang di Media Cetak : HD Indonesia Edisi : 08  (16-30 NOVEMBER 2019)